ക്ഷേത്ര കമ്മിറ്റി
അടിയേരിമഠത്തിന്‍റെ ഭരണപരമായ എല്ലാ പ്രവര്‍ത്തനങ്ങളും നടത്തുന്നത് " ശ്രീ അടിയേരിമഠം ട്രസ്റ്റ് " ആണ്. സുദൃഡമായ ഒരു ഭരണ സംവിധാനവും ചിട്ടയായ പ്രവര്‍ത്തന രീതിയുമാണ് ഇവിടെയുള്ളത്. ട്രസ്റ്റിൻ്റെ എല്ലാ പ്രവർത്തനങ്ങളും വിവിധ സർക്കാർ വകുപ്പുകൾ, ഇൻകം ടാക്സ് ഡിപ്പാർട്ടുമെൻ്റ് തുടങ്ങിയവയുടെ നിയന്ത്രണങ്ങൾക്കും നിർദ്ദേശങ്ങൾക്കും വിധേയമായാണ് നടക്കുന്നത്.
ട്രസ്റ്റിൻ്റെ നിയന്ത്രണത്തില്‍ ദൈനം ദിന പ്രവര്ത്തനങ്ങള് നടത്തുവാന്‍ ശ്രീ അടിയേരിമഠം സേവാസമിതി, പുന:രുദ്ധാരണ പ്രവർത്തനങ്ങൾക്ക് നേതൃത്വം നൽകുന്നതിനുവേണ്ടി നവീകരണ കമ്മിറ്റി, മഹോത്സവവും മറ്റ് ആഘോഷ പരിപാടികളും നടത്തുന്നതിനു വേണ്ടി സമിതി അംഗങ്ങളും മറ്റു ഭക്തജനങ്ങളും ഉള്‍പ്പെടുന്ന ഉത്സവാഘോഷ കമ്മിറ്റി, "വൈവസ്വതം" മാതൃസമിതി, ശ്രീ അടിയേരിമഠം യുവസമിതി, ഉമാമഹേശ്വര ബാലസമാജം തുടങ്ങിയവ ഇവിടെ പ്രവർത്തിക്കുന്നു.
“മാനവസേവ - മാധവസേവ” എന്ന ആപ്തവാക്യം ഉള്‍ക്കൊണ്ടുകൊണ്ട് “സഞ്ജീവനി സേവാപദ്ധതി” എന്ന പേരില്‍ സമിതിയുടെ ഒരു സേവാ പ്രവര്‍ത്തന വിഭാഗംതന്നെ ഇവിടെ പ്രവര്‍ത്തിക്കുന്നുണ്ട്. നിര്‍ദ്ധനരായവര്‍ക്ക് ജീവിതമാര്‍ഗം കണ്ടെത്തുന്നതിനുവേണ്ടി വര്‍ഷംതോറും നടത്തുന്ന “ഗോദാന പദ്ധതി”, സാമ്പത്തികമായി പിന്നോക്കം നില്‍ക്കുന്ന വിദ്ധ്യാര്‍ത്ഥികളുടെ പഠനത്തിനു സഹായിക്കുന്നതിനു വേണ്ടിയുള്ള “വിദ്യാഭ്യാസ സഹായ പദ്ധതി”, സാമ്പത്തിക ക്ളേശം അനുഭവിക്കുന്ന രോഗികള്‍ക്ക് ആശ്വാസമായി “ചികിത്സാ സഹായ പദ്ധതി” തുടങ്ങിയവ ഇവിടുത്തെ പ്രധാന സേവന പ്രവര്‍ത്തനങ്ങളാണ്. കൂടാതെ തദ്ദേശ വാസികള്‍ക്ക് ചികിത്സ, വിദ്യാഭ്യാസം, വിവാഹം തുടങ്ങിയ അവശ്യ ഘട്ടങ്ങളില്‍ താല്‍ക്കാലിക സാമ്പത്തിക സഹായം നല്‍കുവാന്‍ “അക്ഷയ സേവാനിധി”, “പരസ്പരസഹായ നിധി” തുടങ്ങിയ സ്വാശ്രയ പദ്ധതികളും ഇവിടെ പ്രവര്‍ത്തിക്കുന്നു.
പ്രദേശവാസികളിലെ ആത്മീയ നവോത്ഥാനവും സാമൂഹിക കൂട്ടായ്മയും ആധ്യാത്മിക ബോധവും ലക്‌ഷ്യം വച്ച് കൊണ്ട് സമിതി വിപുലമായ മറ്റു പ്രവര്‍ത്തനങ്ങളും നടത്തിവരുന്നു.
ആദ്ധ്യാത്മികതയ്ക്ക് പ്രാധാന്യം നല്‍കിക്കൊണ്ട് ഒരു ഗ്രന്ഥ ശേഖരണത്തിന് സമിതി തുടക്കം കുറിച്ചിട്ടുണ്ട്. കൂടാതെ പുരുഷ-വനിതാ സ്വയം സഹായ സംഘങ്ങള്‍, മാതൃസമിതി, ബാലസമാജം എന്നിവയും സമിതിയുടെ കീഴിലുണ്ട്.
സമീപപ്രദേശങ്ങളിലുള്ള ഭവനങ്ങളില് മാസംതോറും സമിതി അംഗങ്ങള്‍ സമ്പര്‍ക്കം നടത്താറുണ്ട്‌. ഓരോസ്ഥലങ്ങളിലുമുള്ള കുടുംബാംഗങ്ങളെ ഉള്‍പ്പെടുത്തിക്കൊണ്ട് കുടുംബയോഗങ്ങളും, ഭക്തജനങ്ങളെ പങ്കെടുപ്പിച്ചുകൊണ്ട് വര്‍ഷം തോറും വിവിധ സ്ഥലങ്ങളിലേക്ക് തീര്‍ത്ഥ യാത്രകളും സമിതിയുടെ നേതൃത്വത്തില്‍ നടത്തിവരുന്നു.